It's More Fun In The Philippines

SOURCE: http://www.images.google.com

It’s More Fun In The Philippines

Sa Panulat ni Christian A. Gallardo

            “Philippines?! Oh! Such a lovely place, such a lovely place”, wika ng isang Foreigner na natyambahan ng isang interviewer sa Boracay. Matapos kong marinig ang linyang iyon mula sa isang interbyu na napanood ko sa telebisyon ay mas lalong nabusog ang aking puso ng pagmamahal ko sa aking Bayang Sinilangan.

            Ayon sa guro ko sa Ingles noong nasa mataas na paaralan pa lang ako, Nationalism daw ang tawag sa pagmamahal mo sa bansang iyong kinabibilangan. Eh sa bansang katulad ng Pilipinas, ano pa bang mahihiling mo? Dahil sa mga katangian nitong namumukod tangi sa iba pang mga karatig bansa, kahit saan ka lumingon ay masasabi mong “Pinas lang ang mayroon niyan!”. Dagdag pa rito ang sandamakmak na mga Listahan kung saan  nabibilang ang Pilipinas, ang masasabi mo na lang ay “Edi Wow!”.

            Transportation. Pilipinas ang unang bansa sa asya na nagkaroon sa Railway System upang medyum ng transportasyon at maging sa kasalukuyan, katangi-tangi pa rin ang Pilipinas sa aspetong ito.

             Biruin mo ba naman, tila naglalaro ng Stop Dance ang mga tren sa Maynila sa halos araw araw nitong serbisyo. Kung hindi naglalaro ay uugod ugod naman na dahil sa nagsisitandaan nitong mga bagon at riles na nagbubunga naman ng pagkahaba-habang pila ng mga pasahero. Dahil rin dito, madami rin ang nawawalan ng pagkakataon na magawa ang kani-kanilang mga trabaho dahil sa oras na nawawaldas nila sa pilang kanilang nakasasalamuha araw-araw. Sa kabilang banda, nakabubuo naman ito ng bagong Circle of Friends gawa ng pagkaburyot ng mga ito sa pila. Saan ka pa? Sa Pilipinas lang mayroon nyan! Kaya bumagsak sa ikalimang puwesto ang Pilipinas sa listahan ng mga masasayang bansa sa mundo.

            Nature.  Anong kulay ng dagat? Blue! Blue! Nga naman, dahil sa mahirap maipaliwanag na kadahilanan, para sa isang payak na tao ay kulay bughaw ang kulay ng dagat at maging ng iba pang mga anyong tubig. Ngunit sa Pilipinas, iba-iba ang kulay ng tubig sa mga ilog!

            Sa mga ilog na matatagpuan sa mga paanan ng mga bundok, tsokolate ang kulay ng tubig na dumadaloy sa mga ito. Gawa ng mga pagkadami-daming mga ginagawang bagong villages at subdivisions, kailangang putulin ang mga puno na siya namang nagtataglay ng mga ugat na siya ring nagbibigkis sa mga lupa ng mga bundok. Ngunit dahil wala na sila, wala na ring kakapitan ang mga lupang ito kung kaya’t sila na lang ang nagsisilbing kulay na nagbibigay buhay sa mga ilog. Kaya minsan, nakakagutom kapag dumadaan ako sa Marikina River.

            Mayroon ding mga Berdeng ilog. Tampok nito ang mga pesteng Water Hyacinth na inaalagan ng ating Gobyerno. Minsan inaalis nila ito kapag panahon ng eleksiyon at matapos noon ay back to normal na ulit ang lahat.

            Black Water? Hindi pabango yan! Tubig rin yan na mula sa ilog! Nagtataglay naman ito ng iba’t ibang kemikal na humahalo sa tubig ng ilog. Sa sobrang kemikal na nakahalo rito, pruo Janitor Fish na lang ang makikita mong namamalagi rito. Ganyan ka-colorful ang mga ilog sa Pilipinas.

            Government System. “Daan tungo sa Tuwid na Daan”. Panis! Dahil nga Tuwid na Daan, eh bilog din ang mundo, balik tuloy ulit ang Pilipinas sa dati nitong estado… nganga sa pamumuno na mula sa kawani ng pamahalaan. Eh sa mga Senate pa nga lang, naghihilaan na sila ng paa pababa lalo na ngayon at palapit na nang palapit ang Eleksiyon, kailangan na nilang magpabango. Kaya hindi mo alam kung sino na sa kanila ang pagkakatiwalaan mo. Dahil rin sa kanila, madaming natatambak na mga problemang din a masolusyunan hanggang sa mabaon nalang ito sa lupa, kasama na irot ang Korupsyon. Kaya nga nakaka-proud dahil napabilang tayo sa Most Corrupt Countries, nakakagaan sa pakiramdam. Peymus na naman ang Pinas.

            Marahil sa mata ng mga dayuhan, “Such a Lovely Place” ang Pilipinas. Oo nga naman. Madaming maipagmamalaki sa baying ito, pero ewan ko ba kung ano ang takbo ng utak nating mga Pilipino. May pagkapulpol rin kasi tayo. At karamihan sa atin ay hindi pa ganap na mulat ang mga mata sa tunay na estado ng ating bayan. Puro lang talak, wala namang kilos.  Ganyan ang Pinoy. It’s More Fun in the Philippines!